Azam FC yakamilisha usajili wa Muhsin Malima

Muhsin Malima Atua Azam FC kwa Mkataba wa Mwaka Mmoja

Klabu ya Azam FC imekamilisha usajili wa mshambuliaji wa Kitanzania, Muhsin Malima mwenye umri wa miaka 24, akitua kama mchezaji huru baada ya kuachana na ZED FC ya Misri. Malima, ambaye pia ni sehemu ya kikosi cha Taifa Stars, amesaini kandarasi ya mwaka mmoja yenye kipengele cha kuongeza, hatua inayoonesha dhamira ya Azam kuimarisha safu ya mashambulizi kuelekea msimu wa 2025/2026.

Taarifa kutoka ndani ya klabu zinaeleza kuwa nyota huyo tayari amepitia vipimo vya afya na kupewa baraka zote za kujiunga rasmi na timu hiyo yenye maskani yake Chamazi. Usajili huu umetajwa kuwa sehemu ya mpango wa Azam FC kujiimarisha kwa ajili ya mashindano ya Ligi Kuu ya NBC pamoja na michuano ya kimataifa.

Kupitia ujio wa Malima, benchi la ufundi la Azam litakuwa na chaguo jipya katika safu ya ushambuliaji huku mashabiki wakisubiri kwa hamu kumuona akitoa makali yake katika Uwanja wa Chamazi Complex. Malima anatarajiwa kuongeza ushindani na kuleta nguvu mpya katika eneo la mbele la Azam FC.

🔔 Tafuta Nafasi za Kazi? Jiunge na Watanzania wengine kupitia WHATSAPP CHANNEL kwa matangazo ya ajira kila siku!

🌐 Tembelea Habari Wise kwa habari mpya kila siku!