Luhaga Mpina Atangazwa Mgombea Urais wa ACT Wazalendo kwa Uchaguzi Mkuu 2025
Chama cha ACT Wazalendo kimemteua rasmi Luhaga Mpina kuwa mgombea wake wa urais kwa Uchaguzi Mkuu wa Tanzania unaotarajiwa kufanyika Oktoba 29, 2025. Uamuzi huo ulifikiwa na Halmashauri Kuu ya chama hicho jijini Dar es Salaam baada ya kupendekeza majina mawili: Luhaga Mpina na Aaron Kalikawe.
Katika Mkutano Mkuu wa Taifa, Mpina alipigiwa kura na kushinda kwa kishindo kwa kupata kura 559 kati ya 610, sawa na asilimia 92.3, huku Kalikawe akijizolea kura 46 tu (asilimia 7.7). Fatma Ferej ameteuliwa kuwa mgombea mwenza.
Othman Masoud Apeperusha Bendera Zanzibar
Kwa upande wa Zanzibar, Mwenyekiti wa chama hicho, Othman Masoud Othman, ametangazwa kuwa mgombea urais wa Serikali ya Mapinduzi ya Zanzibar baada ya kupata kura 606 kati ya 609 halali zilizopigwa, ikiwa ni asilimia 99.5.
Mpina ni Nani?
Luhaga Joelson Mpina ni mwanasiasa mwenye uzoefu mkubwa aliyehudumu kama Mbunge wa Jimbo la Kisesa kwa vipindi vinne mfululizo tangu mwaka 2005. Akiwa serikalini, aliteuliwa kuwa Naibu Waziri katika Ofisi ya Makamu wa Rais (Mazingira na Muungano) kati ya 2015–2017, kisha kuwa Waziri wa Mifugo na Uvuvi kati ya 2017–2020 chini ya utawala wa hayati John Magufuli.
Ameshiriki pia katika kamati mbalimbali za Bunge ikiwemo Kamati ya Bajeti, Kamati ya Fedha na Uchumi, na Kamati ya Viwanda na Biashara. Ana taaluma ya fedha na amehitimu shahada mbili – moja kutoka Chuo Kikuu cha Dar es Salaam na nyingine kutoka Chuo Kikuu cha Strathclyde nchini Uingereza.
Safari ya Kisiasa na Ukosoaji wa Serikali
Mpina amejijengea jina kama mkosoaji wa wazi ndani ya Bunge, akiweka mbele maslahi ya wananchi kuliko siasa za chama. Akiwa bado ndani ya CCM, alikosoa hadharani serikali kuhusu masuala kama sukari, wizi wa fedha za umma na uendeshaji wa wizara mbalimbali.
Mwaka 2024, aliwasilisha kesi ya kikatiba dhidi ya viongozi waandamizi serikalini akiwemo Waziri wa Kilimo Hussein Bashe, Waziri wa Fedha Dkt. Mwigulu Nchemba, na Mwanasheria Mkuu wa Serikali, akipinga uamuzi wa kutoa vibali vya sukari kwa kampuni zisizo na viwanda na kuisababishia serikali hasara ya zaidi ya shilingi bilioni 1.5.
Kutemwa na CCM na Safari Mpya ACT
Uhusiano wa Mpina na CCM uliingia doa baada ya kauli yake ya hadharani kwa Rais Samia Suluhu alipoitembelea Jimbo la Kisesa, akidai kuwa serikali imeshindwa kutekeleza ahadi zake kwa wananchi wake. Kauli hiyo ilimfanya Rais Samia kumjibu wazi kuwa alikuwa anatafuta umaarufu bila mafanikio ya kweli.
Baadaye, jina lake lilikatwa katika mchakato wa kura za maoni ndani ya CCM, jambo lililoibua hisia za kwamba chama hicho hakimtaki tena. Tarehe 6 Agosti 2025, Mpina alitangaza kuhamia ACT Wazalendo, siku moja baada ya vikao vya chama hicho kuidhinisha uhamisho wake.
Uwanja Mpya wa Kukosoa kwa Uhuru
Kwa mujibu wa wachambuzi wa siasa, ACT Wazalendo imempa Mpina nafasi ya kuendeleza ukosoaji wake kwa uhuru zaidi dhidi ya serikali ya CCM, tofauti na alivyojizuia awali akiwa ndani ya chama tawala.
Kwa uteuzi huu, Luhaga Mpina sasa ni mmoja wa wagombea wakuu atakayechuana na Rais Samia Suluhu Hassan kwenye uchaguzi mkuu wa Oktoba 29, 2025.
🔔 Kwa habari mpya Kila siku. Jiunge na Watanzania wengine kupitia WHATSAPP CHANNEL kwa matangazo ya habari kila siku!
🌐 Tembelea Habari Wise kwa habari mpya kila siku!
