Mtihani wa Gamondi Leo CECAFA Kagame Cup 2025
Klabu ya Singida Black Stars FC leo Jumanne inaanza kampeni yake ya CECAFA Kagame Cup 2025 kwa kuvaana na Ethiopian Coffee SC kwenye Uwanja wa Jenerali Isamuhyo. Hii ni mechi muhimu ya Kundi A na pia mtihani wa kwanza kwa kocha mpya wa timu hiyo, Miguel Gamondi, tangu alipojiunga msimu huu.
Ratiba ya Michezo ya Ufunguzi
Mchezo wa Singida Black Stars dhidi ya Ethiopian Coffee utapigwa baada ya pambano la ufunguzi kati ya Kenya Police FC na Garde Cotes FC ya Djibouti saa 7 mchana.
Kauli ya Kocha Gamondi
Gamondi, ambaye aliwahi kufundisha Yanga SC, amesema michuano hii ni fursa muhimu ya kuandaa kikosi chake kuelekea Ligi Kuu Tanzania Bara na Kombe la Shirikisho Afrika (CAF Confederation Cup).
“Mashindano haya yanatupa nafasi ya kujaribu wachezaji kadhaa tunapojipanga kwa msimu mpya wa Ligi Kuu na Kombe la Shirikisho la CAF,” alisema Gamondi.
Nyota wa Kutegemewa
Singida Black Stars itategemea zaidi wachezaji wake wapya akiwemo kiungo wa kimataifa kutoka Zambia, Clatous Chama, aliyesajiliwa kutoka Yanga SC, pamoja na Khalid Aucho wa Uganda atakayekutana na kikosi baada ya majukumu yake na Uganda Cranes.
Ethiopian Coffee Wajipanga
Kwa upande wa wapinzani, kocha wa Ethiopian Coffee, Abiy Kassahun, amesisitiza kuwa kikosi chake kipo tayari kwa changamoto za michuano hii.
Kuhusu CECAFA Kagame Cup 2025
Mashindano ya CECAFA Kagame Cup 2025 yanashirikisha jumla ya timu 12, yakidhaminiwa na Betika huku Times FM ya Tanzania ikiwa mshirika. Rais wa Rwanda, Paul Kagame, anaendelea kuwa mlezi na mdhamini mkuu wa mashindano haya ya muda mrefu yenye historia kubwa katika soka la Afrika Mashariki na Kati.
